رامي خير الله عضو رابطة عائلات قيصر خلد يوم اعتقال والده “الشــهيد عبـــدالخـــالق خـــير اللـــه” بكلمات عبر فيها عن افتقاده له وإصراره على محاسبة قاتليه:
“16/5/2012 تاريخ ما بينمحى من ذاكرتي.. كل ما بيرجع هاليوم 16 أيار بتذكر وقت كان عمري 12 سنة كيف كنت عاجزتماماً وقت قالولي أبوك اعتقلوه من الحاجز.. ما حسنت أعمل شي غير البكي والشعور بالعجز والقهر والخوف عأبي، كل ما بيجي 16 أيار بحس بنفس المشاعر. صار عمري 24 لليوم ما حسنت آخد بثأر أبي المظلوم .
أبي الغالي جرح روحي النازف من كل قلبي بتمنى لو كان عمري يوم اعتقالك بيسمحلي اني اعتقل بدالك ويطالعوك وأفديك بروحي يا نور عيني. ما بعرف لسا كم 16 أيار رح يمر عليّ وعيش هل يوم الأسود يلي راح فيه سندي وقطعة من قلبي ونور عيوني. لو كنت موجود يا أبو رامي وتشوفني وتشوف أخواتي ونحن رافعين راسك وكيف الناس بتقول نعمَ مين رباكم.
وتشوفنا عم نشتغل ونتعب مثلك ونعيش من عرق جبيننا وما نكون عالة عالمجتمع متل ماعلمتنا.. ياريتك تشوف أخي شادي يلي وصيتني فيه آخر مرّة شفتك فيها، وقت كان عمره سنة، اليوم صار 13 عام ومجتهد بدراسته عملاً برغبتك.
شقد بتمنى لو إنك موجود وتشيل ولادي وتبوسهم ويشوفوك ويعرفوا جدهم الحنون. لو تشوف أخي فادي كيف صار شب عمره 23 عام كل الناس بتحمد فيه وبأخلاقه. أنا صارعندي 3 بنات وكل ما بيجيني مولودة بتذكرك وبتنزل دموعي.. شقد عم اشتهي لو انك موجود وتختار أسماء بناتي وتأذن لهن. بتمنى وقت بدي آخد قرار تكون جنبي وتقلي شو الصح ووين الغلط. شقد بتمنى لو شوفك وأبوس إيديك وحط راسي ع كتفك أو عرجليك ونام براحة واطمئنان متل ما كنت نام جنبك بصغري وأحس الدنيا ملكي…
ياريت نشوفك أنا وأخوتي لو مرة وحدة وترضى علينا وتكون مبسوط ونشوف ضحكتك يلي ما بتفارق خيالنا.. لكن هيهاااات
لكن بعد كلشي قاسيته بحياتي من حزن وفقد وتهجير وغربة ما رح أترك حقك، رح طالب بمحاسبة قاتليك لآخر لحظة بعمري
هذا ما كتبته بدموع عيوني في ذكرى اعتقال أبي..
الله يرحمك يا فقيد قلبي ويتقبلك بين شهداء والصديقين”.
